Fréttir

Þann 11.-13. ágúst sl.fóru þeir ráðgjafar sem eru í samstarfi við Starfsendurhæfingarsjóð á þriggja daga námskeið í jákvæðri sálfræði. Við nýttum tækifærið og buðum ráðgjöfunum í morgunkaffi hjá okkur í Sætúni 1. Þetta er orðinn stór hópur ráðgjafa og þarna voru samankomnir 10 ráðgjafar sem starfa hjá stéttarfélögum á mismundndi stöðum á landinu, m.a frá Reykjavík, Akureyri, Ísafirði, Selfossi, Vestmannaeyjum, Akranesi o.fl. Þann 7.-11. september mun Starfsendurhæfingarsjóður svo halda námskeið fyrir alla ráðgjafana.

Búið er að ganga frá ráðningu tveggja ráðgjafa hjá BSRB og munu þeir hefja störf í byrjun september.   Þeir einstaklingar sem urðu fyrir valinu í þessi störf eru Karen Björnsdóttir náms- og starfsráðgjafi og Soffía Eiríksdóttir hjúkrunarfræðingur.   Starfsstöð þeirra verður hjá sjúkrasjóðum BSRB að Grettisgötu 89 Reykjavík en þær munu einnig eiga góða samvinnu við ráðgjafa utan höfuðborgarsvæðisins vegna félagsmanna aðildarfélaga BSRB á landsbyggðinni.

Í þessari viku hófu þrír nýjir ráðgjafar störf á vegum VIRK. Þetta eru Ágústa Guðmarsdóttir, Hrefna Óskarsdóttir og Sigrún Sigurðardóttir. Hrefna er staðsett í Vestmannaeyjum og starfar fyrir stéttarfélögin þar, Ágústa starfar fyrir stéttarfélög á Suðurlandi og er með aðsetur á Selfossi. Sigrún starfar fyrir iðnaðarmannafélögin á höfuðborgarsvæðinu og er með aðsetur í Borgartúni og á Stórhöfða í Reykjavík. Netföng þeirra og símanúmer er hægt að sjá hér. Við bjóðum þær velkomnar til starfa. Á næstunni munu síðan þrír ráðgjafar í viðbót hefja störf hjá BSRB og BHM.

Minni fjarvistir eru frá vinnu í einkageiranum í kreppunni í Bretlandi, en kreppan virðist hafa lítil áhrif á fjarvistir í opinbera geiranum. Fjarvistir í einkageiranum hafa minnkað mjög frá því á síðasta ári, en samkvæmt tölum frá CIPD (Chartered Institute of Personnel and Development) eru fjarvistir nánast jafn miklar og áður í opinbera geiranum . Samkvæmt fjarvistakönnun CIPD hefur fjarvistum fækkað úr 7,2 dögum á starfsmann á árinu 2008 í 6,4 daga á þessu ári. Fjarvistir í opinbera geiranum halda áfram að vera háar, þ.e. 9,7 dagar á starfsmann á þessu ári miðað við 9,8 daga í fyrra.  Ben Willmott, stefnumótunarráðgjafi hjá CIPD segir það vonbrigði að  fjarvistir í opinbera geiranum séu enn svo margar.  CIPD reiknaði út meðalkostnað á fjarvistir starfsmanna á ári og telur meðalkostnað vera 784 pund (163.072 Ikr)  á opinberan starfsmann ári og 666 pund (138.528 Ikr)  á starfsmann í einkageiranum. Ástæður þessa mismunar milli opinbera geirans og einkageirans eru flóknar. Önnur dreifing á starfsfólki, kynjaskipting, aldursskipting, krefjandi starfsemi og öðru vísi stjórnun, réttindi og skyldur. Fjarvist er t.d. ólíklegri til að hafa áhrif á laun starfsmanns í opinbera geiranum og veikindaréttindi eru meiri. Ben telur að  árangursrík fjarvistastjórnun feli í sér að finna jafnvægið á milli þess að veita stuðning við að hjálpa starfsmönnum með heilsuvanda að vera áfram í vinnu og koma fljótt aftur til vinnu og að hafa harða afstöðu gegn þeim sem misnota veikindarétt sinn. Mikill misbrestur sé á að þessu jafnvægi sé náð.   Þessi könnun sem vitnað er í  var gerð áður en Svínaflensan varð fréttaefni, en CIPD sagði að meðalkostnaðartölur vegna fjarvista gætu gefið til kynna þann efnahagslega skaða sem Svínaflensufaraldur gæti valdið. (People Management Magazine 20. júlí 2009) Hinsvegar varar SWASH (Survey of Workplace Absence Sickness and ill Health) við því árið 2005 að tölur um fjarvistir frá vinnu segi ekki alltaf alla söguna. Þar er bent á að ef leiðrétt er fyrir breytum sem Ben Willmott nefnir sem hugsanlegum skýringum á þeim mismun sem kemur fram í skýrslu CIPD, auk annarra breyta s.s. stærðar fyrirtækis þá komi í ljós að munurinn sé 0,3 dagar á starfsmann á ári að meðaltali. Það breytir þó ekki því að enn er mikið óunnið í fyrirtækjum bæði opinberum og einkafyrirtækjum í Bretlandi á svið fjarvistastjórnunar og það sama á við um Ísland.    

Hrefna Óskarsdóttir iðjuþjálfi hefur verið ráðin í stöðu ráðgjafa í Vestmannaeyjum.  Hún mun veita einstaklingum í Vestmannaeyjum þjónustu á sviði starfsendurhæfingar auk þess að starfa náið með stéttarfélögum starfsmanna,  atvinnurekendum og öðrum hagsmunaaðilum á svæðinu.  Hrefna hefur störf í byrjun ágúst nk. Við bjóðum Hrefnu velkomna til starfa og hlökkum til samstarfsins.

Skrifað hefur verið undir samning við stéttarfélög í Vestmannaeyjum um þjónustu ráðgjafa.  Átta stéttarfélög í Vestmannaeyjum skrifuðu undir samninginn en samningurinn nær til allra félagsmanna þessara stéttarfélaga.  Þessi félög eru Drífandi stéttarfélag, Deild VR í Vestmannaeyjum, Félag iðn- og tæknigreina, Sjómannafélagið Jötunn, Starfsmannafélag Vestmannaeyjabæjar, Skiptsjóra og stýrimannafélagið Verðandi, Verkstjórafélag Vestmannaeyja og Félag vélstjóra og málmtæknimanna. Starfsorka, Starfsendurhæfing Vestmannaeyja, mun taka að sér ráðgjafastarfið fyrir hönd stéttarfélaganna og mun, í samvinnu við þau, bjóða félagsmönnum upp á þjónustu á sviði starfsendurhæfingar. Auglýst verður eftir umsóknum um starf ráðgjafa á næstu dögum.

Ágústa Guðmarsdóttir sjúkraþjálfari hefur verið ráðin í stöðu ráðgjafa á Suðurlandi.  Ágústa hefur mikla þekkingu og reynslu á sviði vinnuvistfræði og vinnuumhverfis.  Hún mun veita einstaklingum á Suðurlandi þjónustu á sviði starfsendurhæfingar auk þess að starfa náið með stéttarfélögum starfsmanna og atvinnurekendum á svæðinu.  Ágústa hefur störf í byrjun ágúst nk.

Starfsendurhæfingarsjóður og VR hafa gengið frá samningi um störf ráðgjafa hjá VR.  VR hefur boðið félagsmönnum sínum sem fá greidda sjúkradagpeninga úr sjúkrasjóði upp á þjónustu ráðgjafa nú um nokkurt skeið.  Með samningi við Starfsendurhæfingarsjóð er hins vegar samstarf milli VR og Starfsendurhæfingarsjóðs eflt og komið í tiltekinn farveg.  M.a. verður stöðugildum ráðgjafa fjölgað og verksvið þeirra er aukið.

Sigrún Sigurðardóttir hefur verið ráðin sem ráðgjafi fyrir eftirfarandi stéttarfélög vegna félagsmanna þeirra á höfuðborgarsvæðinu: Rafiðnaðarsamband Íslands Félag vélstjóra og málmtæknimanna Matvís Félag hársnyrtisveina Mjólkurfræðingafélag Íslands Fagfélagið Félag bókagerðarmanna Félag iðn- og tæknigreina Félag leiðsögumanna Flugfreyjufélag Íslands Verkstjórasamband Íslands Sigrún hefur mikla reynslu á sviði fræðslu og starfsendurhæfingar og hefur hún lokið námi í uppeldis og menntunarfræði ásamt því að hafa lokið kennslufræði til kennsluréttinda.  Hún mun hefja störf í byrjun ágúst.

Vinnan hefur áhrif á heilbrigði einstaklinga og að sama skapi hefur heilbrigði einstaklinga margvísleg áhrif á vinnuna.   Algengir þættir sem hafa áhrif á þetta samspil eru endurkoma til vinnu eftir veikindi eða slys, viðbrögð við veikindum eða vinnuslysum, heilsusamlegt umhverfi og hvatning til heilsueflingar. Allir þessir þættir geta haft áhrif á framleiðni fyrirtækis.   Við leggjum áherslu á snemmbær inngrip og endurkomu til vinnu.  Flestir koma aftur til vinnu fljótlega eftir veikindafjarvist, en marktækur minnihluti er fjarverandi til langs tíma og sumir koma aldrei aftur til vinnu. Þegar þörf er á fjarvist frá vinnu vegna slyss eða veikinda, þá verður fjarvistin sjálf að áhyggjuefni. Margar vel unnar rannsóknir benda eindregið til þess að vinnan sjálf sé heilsueflandi fyrir flesta og að hún sé mikilvægur þáttur í endurhæfingu einstaklingsins.  Að auki benda rannsóknir eindregið til þess að því lengur sem einstaklingur er ekki í vinnu, því ólíklegri sé hann til að fara aftur til vinnu. Eftir nokkra mánuði minnka líkurnar á endurkomu til vinnu svo mikið að hugsanlegt er að viðkomandi fari aldrei í vinnu aftur. Þegar þetta gerist eru persónulegar og fjárhagslegar afleiðingar fyrir einstaklinginn alvarlegar. Vinnuleysið er hættulegt heilsu einstaklingsins og dýrt fyrir samfélagið. Í mörgum tilfellum má forðast neikvæðar afleiðingar veikindafjarvista, þær eru ekki náttúrulögmál. Möguleikarnir á því að geta snúið aftur til vinnu tengjast engan veginn eingöngu alvarleika slyss eða sjúkdóms. Staðreyndin er sú að aðrir þættir eru miklu mikilvægari. Þetta eru þættir eins og læknismeðferð og önnur heilbrigðisþjónusta, snemmbært inngrip, viðbrögð atvinnurekandans við veikindunum, ákvarðanir sem teknar eru á vinnustaðnum, viðhorf einstaklingsins og fjölskyldu hans, viðhorf heilbrigðisstarfsfólks, samstarfsmanna, yfirmanna og atvinnurekenda. Þetta  eru allt  mikilvægir áhrifaþættir  á bataferlið og endurkomu til starfa.   Rannsóknir sýna að læknismeðferð ein og sér er ekki nægileg til að auka líkur á endurkomu til vinnu, það er þverfaglegt verkefni.  Í starfsendurhæfingu er því lögð áhersla á þátttöku einstaklingsins, atvinnurekenda, heilsugæslu, öryggis- og trúnaðarmanna og fjölda sérfræðinga  sem hver fyrir sig leggur til sína sérþekkingu til að einstaklingurinn nái árangri og komist aftur í vinnu.