Fréttir

Búið er að ganga frá ráðningu ráðgjafa fyrir öll stéttarfélög á Vestfjörðum.  Ráðgjafinn heitir Fanney Pálsdóttir og er sjúkraþjálfari.  Fanney hóf störf 5 maí sl og mun veita félagsmönnum stéttarfélaga á Vestfjörðum þjónustu ef um er að ræða skerta vinnugetu vegna veikinda eða slysa. 

Í gær var haldinn morgunverðarfundur um starfsendurhæfingu á Grand Hótel Reykjavík. Mætingin á fundinn var mjög góð og mættu alls um 120 manns á fundinn.  Vigdís Jónsdóttir flutti erindi um hlutverk Starfsendurhæfingarsjóðs og stöðuna í dag og eftir það hélt Gail Kovacs, alþjóðlegur ráðgjafi í starfsendurhæfingu mjög fróðlegt erindi um strauma og stefnur í starfsendurhæfingu í dag. Við hjá Starfsendurhæfingarjsjóði viljum þakka fyrir frábæra mætingu á fundinn og vonandi hafa þeir aðilar sem mættu á fundinn fengið skýra mynd af hlutverki Starfsendurhæfingarsjóðs og haft gagn af erindi Gail Kovacs. Smellið hér til að skoða myndir af fundinum Hægt er að nálgast glærurnar undir liðnum kynningarefni hérna hægra megin á síðunni.

Ársfundur Starfsendurhæfingarsjóðs var haldinn mánudaginn 27. apríl sl. á Grand hótel Reykjavík.   Gylfi Arnbjörnsson stjórnarformaður VIRK og Vigdís Jónsdóttir framkvæmdarstjóri VIRK fóru yfir stöðu mála varðandi starfsemi og uppbyggingu sjóðsins.  Ársreikningur var samþykktur og tilkynnt var um skipan stjórnar til næstu tveggja ára.  Í lok fundarins hélt Gail Kovacs sérfræðingur og alþjóðlegur ráðgjafi á sviði starfsendurhæfingar áhugavert erindi um strauma og stefnur í starfsendurhæfingu.

Starfsendurhæfingarsjóður býður til morgunverðarfundar um starfsendurhæfingu þriðjudaginn 28. apríl nk. kl. 8:15 – 10:00 á Grand Hótel Reykjavík.  Sérstakur gestur okkar á fundinum verður Gail Kovacs en hún er sérfræðingur á sviði starfsendurhæfingar og hefur starfað sem alþjóðlegur ráðgjafi á því sviði um áratuga skeið í Bretlandi, Kanada og Bandaríkunum. Nánari upplýsingar um dagskrá fundarins er að finna hér. Búið er að loka fyrir skráningu á morgunverðarfundinn.

Ársfundur Starfsendurhæfingarsjóðs verður haldinn mánudaginn 27. apríl nk. kl. 13:30 á Grand hótel Reykjavík.   Auk hefðbundinna ársfundarstarfa mun Gail Kovacs sérfræðingur og alþjóðlegur ráðgjafi á sviði starfsendurhæfingar flytja áhugavert erindi um strauma og stefnur í starfsendurhæfingu.

Undirbúningur er hafinn víða um land við að koma af stað ráðgjafaþjónustu hjá stéttarfélögum.  Á höfuðborgarsvæðinu er m.a. verið að skoða möguleika á samstarfi á milli mismunandi félaga um útfærslu á ráðgjafaþjónustunni en ljóst er að stærstu félögin s.s. Efling og VR munu hafa sína eigin ráðgjafa og að öllum líkindum fleiri en eitt stöðugildi. 

Þann 11.mars sl. var ráðinn endurhæfingarráðgjafi hjá Eflingu, Soffía Erla Einarsdóttir, sem kemur til með að vinna í nánu sambandi við Starfsendurhæfingarsjóð. Soffía Erla var ráðin úr stórum hópi umsækjenda. Hún kemur til starfa hjá Eflingu þriðjudaginn 24.mars.

Nú eru ráðgjafarnir okkar búnir að ljúka seinni lotu grunnnámskeiðs. Í þessari lotu sem stóð í tvo daga var fjallað um ýmsa mikilvæga þætti. Umræður voru um notkun upplýsingatækni í starfi ráðgjafa, um velferðarkerfið og réttindi og skyldur launþega á vinnumarkaði, orsakir fyrir skertri starfsorku, mats- og flokkunarkerfi í starfsendurhæfingu, persónuvernd og siðareglur, heilsueflingu í starfsendurhæfingu og úrræðií starfsendurhæfingu.

Dagana 18. og 19. febrúar var haldið fyrra námskeið  í fjögurra daga námskeiðslotu fyrir ráðgjafa Starfsendurhæfingarsjóðs. Fyrri daginn var fjallað um starfsemi Sterfsendurhlæfingarsjóðs, hugmyndafræði sjóðsins, hlutverk ráðgjafa og vinnuferla og sáu sérfræðingar sjóðsins um fræðsluna. Seinni daginn hélt Árelía Eydís Guðmundsdóttir dósent við HÍ námskeið um samskipti og hvatningu, en stór hluti af starfi ráðgjafa felst einmitt í hvatningu og uppbyggjandi samskiptum við fólk. Áætlað er að halda seinni hluta námskeiðslotunnar dagana 3. og 4. mars, en þá verður m.a. fjallað um persónuvernd, siðareglur, lög og reglugerðir sem tengjast vinnumarkaði og algengar ástæður fyrir skertri starfsorku. Í framtíðinni er gert ráð fyrir að allir ráðgjafar sæki grunnnámskeið hjá Starfsendurhæfingarsjóði fljótlega eftir að þeir hefja störf og að síðan verði ráðgjöfum tryggð símenntun  í formi námskeiða eða námsdaga á vegum sjóðsins einu sinni til tvisvar á ári. Tilgangurinn með námskeiðunum er að tryggja að allir vinni eftir sömu hugmyndafræði, aðferðafræði og vinnuferlum og að ráðgjafarnir sem munu starfa dreift um allt land kynnist érfræðingum Starfsendurhæfingarsjóðs og öðrum ráðgjöfum til að auðvelda samskipti og samvinnu.  

Niðurstöður rannsókna benda til þess að  starfsendurhæfing sé áhrifarík aðgerð til að varna því að fólk „detti varanlega út“ af vinnumarkaði sökum veikinda eða sjúkdóma.  Snemmbær ráðgjöf á þessu sviði hefur gefið góða raun og er ein mikilvægasta íhlutunin þegar horft er til þess að samræma endurhæfingarferli einstaklinga og ná jákvæðum árangri.  Ráðgjafinn fylgir  einstaklingnum eftir meðan á endurhæfingarferlinu stendur.  Rannsóknir hafa sýnt að árangur starfsendurhæfingar tengist meðal annars því að gott samband myndist  milli ráðgjafans og einstaklingsins og að vel takist til við að vekja og virkja áhugahvöt einstaklingsins  og stuðla að aukinni virkni hans við að  bæta heilsu sína og auka starfsorku. Fjöldi rannsókna hafa verið gerðar til að meta fjárhagslega hagkvæmni þess  að endurhæfa fólk til starfa eftir slys eða sjúkdóma. Allar benda þær til þess að starfsendurhæfing sé fjárhagslega hagkvæm. Hlutfallslegur ávinningur er misjafn eftir rannsóknum og viðfangsefnum, allt frá því að fyrir hverja einingu fjármuna sem er varið til starfsendurhæfingar, skili tvær einingar sér til baka til samfélagsins í sköttum og framleiðni  (1:2) og  í að fyrir hverja einingu, skili átján sér til baka í sjóði samfélagsins (1:18).  Engin rannsókn sem skoðuð var benti til þess að kostnaður væri meiri en ávinningur. Starfsmannastefna fyrirtækja, hvað varðar heilsueflingu, forvarnir og öryggi, ásamt vilja til að  auðvelda fólki endurkomu til vinnu  eftir slys eða veikindi,  hefur mikil áhrif á tíðni veikindadaga og vinnuslysa. Í fyrirtækjum sem lögðu  áherslu á þessa þætti var minna um óskir um sjúkradagpeninga og örorku en hjá þeim sem leggja ekki áherslu á þessa þætti í starfsmannastefnu sinni. (Samantekt úr grein Steven R. Pruett hjá Ohio State University, Empirical evidence supporting the effectiveness of vocational rehabilitation, sem birtist í Journal of Rehabilitation April-June 2008)