Fréttir

Gengið hefur verið frá nýrri skipulagsskrá fyrir Endurhæfingarsjóð þar sem samtök launamanna og atvinnurekendur hjá hinu opinbera gerðust aðilar að sjóðnum.  Við þetta tækifæri var nafni sjóðsins breytt til að endurspegla betur starfsemi hans og heitir hann nú Starfsendurhæfingarsjóður. Með þessu er stigið mikilvægt skref í þá átt að tryggja öllum starfsmönnum á vinnumarkaði þjónustu í formi starfsendurhæfingar ef um er að ræða skerta vinnugetu vegna veikinda eða slysa.

Endurhæfingarsjóður óskar samstarfsaðilum og landsmönnum öllum gleðilegrar hátíðar og farsældar á komandi ári.  Við þökkum gott samstarf á liðnu ári og óskum þess að nýtt ár megi fela í sér tækifæri til gæfu og góðs gengis.

Undanfarnar vikur hafa starfsmenn Endurhæfingarsjóðs unnið að því að safna saman gögnum og afla þekkingar á ýmsum þáttum er snúa að starfsendurhæfingu og starfshæfnismati.  Í byrjun desember sóttu 2 starfsmenn sjóðsins námskeið í "Arbejdsevnemetoden" en það er sú aðferðarfræði sem notuð er í Danmörku við að virkja einstaklinga til þátttöku á vinnumarkaði og meta starfshæfni.  Einnig höfum við verið í sambandi við einn helsta sérfræðing Noregs í starfshæfnismati og rætt við hann ýmsar hugmyndir og tillögur sem eru í þróun hjá okkur.

Þessa dagana er Endurhæfingarsjóður að fara af stað með tilraunaverkefni í samvinnu við þrjá sjúkrasjóði.   Markmiðið með tilrauninni er að undirbúa og þróa  starf ráðgjafa hjá sjúkrasjóðum stéttarfélaga um allt land og meta þörf fyrir fræðslu og aðstoð.  Tilraunin felst m.a. í prófun og þróun á tilteknum aðferðum, starfsháttum, gátlistum og leiðbeiningum sem ráðgjafinn þarf að nota í sínu starfi.   Einnig er unnið að því að þróa fyrirkomulag við meðhöndlun og varðveislu gagna sem uppfyllir lög og reglur um persónuvernd.  

Undirbúningur að faglegri vinnu og uppbyggingu hjá Endurhæfingarsjóði hófst í ágúst 2008 og þessa dagana er þessi vinna í fullum gangi.. Verið er að móta starf ráðgjafa hjá sjúkrasjóðum stéttarfélagana, safna upplýsingum og vinna í mótun gátlista og matskerfa í samvinnu við fleiri aðila.  Starfsmenn Endurhæfingarsjóðs hafa einnig lagt áherslu á að kynna sér starfsemi sjúkrasjóða stéttarfélaga og funda með væntanlegum samstarfsaðilum m.a. innan stéttarfélaga og lífeyrissjóða. Mikilvægur þáttur í undirbúningsferlinu er einnig upplýsingasöfnun.  Verið er að safna saman upplýsingum um endurhæfingarúrræði um allt land og einnig eru starfsmenn sjóðsins að kynna sér þær leiðir og þær aðferðir sem notaðar eru í starfsendurhæfingu t.d. á hinum Norðurlöndunum.