Fréttir

Um 200 manns mættu á ársfund VIRK 2012 sem haldinn var í salnum Norðurljós í Hörpu síðastliðinn fimmtudag (12. apríl 2012).  Fundurinn hófst með ávarpi Guðbjarts Hannessonar velferðarráðherra.  Vigdís Jónsdóttir fór síðan yfir starfsemi VIRK á síðasta ári og stefnu til framtíðar og að því loknu hélt Ingibjörg H. Jónsdóttir prófessor við Institute of Stress Medicine í Gautaborg áhugavert erindi um reynslu og niðurstöður nýjustu rannsókna varðandi forvarnir og starfsendurhæfingu vegna kulnunar og síþreytu.  Að loknu kaffihléi voru síðan hefðbundin ársfundarstörf á dagskrá þar sem ársreikningur var samþykktur, endurskoðandi kjörinn og tilkynnt um skipan í stjórn til næstu tveggja ára.  Stjórn og stofnaðilar lögðu til breytingar á skipulagsskrá sem voru samþykktar á fundinum og miða þær að því tryggja aðild Landssamtaka lífeyrissjóða að stjórn og fulltrúaráði VIRK.  Nýtt ársrit VIRK um starfsendurhæfingu er komið út og var því dreift á fundinum.  Þeir sem vilja fá eintak af ársritinu geta nálgast það á skrifstofu VIRK eða sent póst á virk@virk.is og fengið það sent.  Rafræna útgáfu af ársritinu er einnig að finna hér:  Ársrit VIRK 2012 Einnig er hægt að nálgast önnur gögn af ársfundinum hér á heimasíðu VIRK þar á meðal afrit af glærum Vigdísar Jónsdóttur framkvæmdastjóra VIRK og upplýsingar frá Ingibjörgu Jónsdóttur Prófessor við Institute of Stress Medicine í Gautaborg.

Með tveimur nýjum myndböndum:   Vellíðan á vinnumiðstöðinni og Siðferði og viðskiptasjónarmið í jafnvægi, eru samtals átta myndbönd um fjarverustjórnun komin á heimasíðu VIRK. Myndböndin eru tekin upp í dönskum fyrirtækjum en hafa verið textuð á íslensku. Fjarverustjórnun er ekki algengt hugtak á Íslandi en ætti í raun að vera eðlilegur hluti af  starfsmannastjórnun. Í myndböndunum er gerð grein fyrir því um hvað fjarverustjórnun snýst og eiga þau þar af leiðandi að höfða bæði til starfsfólks og stjórnenda. Meðal þess sem myndböndin greina frá er ávinningur þess að vinna markvisst með veikindafjarveru á vinnustöðum, aukin vellíðun á vinnustað í kjölfar þess að veikindafjarvistir verða hluti af eðlilegu umræðuefni, að stjórnendur beri aukna umhyggju fyrir starfsfólki sínu, að starfsfólk beri umhyggju hvert fyrir öðru, þegar stjórnendur hafa samband við starfsfólk í veikindum eru auknar líkur á að það snúi fyrr til baka úr veikindaleyfi og að samstarfsfólk sé umburðarlynt gagnvart þeim sem geta ekki innt af hendi fulla starfsgetu á meðan bataferli stendur, svo einhver dæmi séu nefnd. Til þess að vel takist til um fjarverustefnur er brýnt að millistjórnendur fái víðtæka fræðslu frá yfirstjórn fyrirtækisins eða stofnunarinnar og að trúnaðarmenn séu einnig með í ráðum.

Ársfundur VIRK verður haldinn fimmtudaginn 12. apríl 2012 kl. 8:00 til 12:00 í Hörpu í salnum Norðurljós. Dagskráin er tvískipt. Fyrri hluti fundarins inniheldur fræðandi erindi og hefst hann með ávarpi Guðbjarts Hannessonar velferðarráðherra kl. 8:15. Vigdís Jónsdóttir framkvæmdastjóri VIRK mun síðan fara yfir starfsemi VIRK á síðastliðnu ári og Ingibjörg Jónsdóttir prófessor við Institute of Stress Medicine í Gautaborg mun halda erindi um reynslu og niðurstöður nýjustu rannsókna varðandi forvarnir og starfsendurhæfingu vegna kulnunar og síþreytu á vinnustöðum. Kaffihlé verður frá kl. 10:30 til 11:00 og að því loknu hefjast hefðbundin ársfundarstörf. Nánari upplýsingar um dagskrá ársfundarins er að finna  hér. Ársfundurinn er öllum opinn og einnig er hægt að taka einungis þátt í fyrri hluta fundarins frá kl. 8:00 – 10:00. Nauðsynlegt er að skrá þátttöku og það er hægt að gera hér (sjá einnig skráningarmöguleika hér til hægri á heimasíðunni).

Starf ráðgjafa í starfsendurhæfingu á vegum VIRK og stéttarfélaga um allt land er nýtt hér á landi.  Ráðgjafar eru ráðnir til stéttarfélaga en VIRK stýrir þeirra faglega starfi.  Starf þeirra hefur verið í mikilli þróun þar sem sífellt er verið að bæta þeirra vinnulag og finna leiðir til að gera starfið sem árangursríkast.  Ráðgjafar hafa bent á að þeim finnst þeir búa við nokkuð mikið álag í starfi og eins hefur verið kallað á að sett séu skýrari viðmið um það hvað telst eðlilegur fjöldi viðtala og einstaklinga í starfi ráðgjafa.  Á sama tíma er þjónustan í sífelldri þróun og við erum að reka okkur á nýja hluti svo það hefur ekki verið einfalt að setja ákveðin viðmið í þessu samhengi.

Fjarverusamtal er eitt af þeim verkfærum sem VIRK hefur verið að þróa í samstarfi við þátttökufyrirtækin í verkefninu Virkur vinnustaður. Þetta samtalsform getur nýst stjórnendum sem formlegur samtalsrammi vegna skammtímafjarveru starfsmanna. Mikilvægt er að ræða við starfsmenn sem er með tíðar skammtímafjarvistir út frá skráðum fjarvistum og þeim aðstæðum sem geta haft áhrif á mætingu þeirra. Leiðbeiningar um fjarverusamtal og samtalsform má nálgast hér. 

Bakkaskóli í Fredericia er venjulegur danskur grunnskóli. Á síðasta ári voru 35 af 45 kennurum skólans aldrei veikir. Þann árangur má rekja til fjarverustefnu vinnustaðarins þar sem áhersla er lögð á forvarnir, umhyggju starfsfólksins gagnvart hvert öðru, gagnkvæmt traust og að skólastjórinn er sýnilegur. Stofnaður var þriggja manna starfshópur sem fylgist með líðan samstarfsfólksins og reynt er að grípa inn í áður en starfsmaður verður veikur. Í myndbandi númer 5 má sjá hvernig skólastjórinn og trúnaðarmaður lýsa ferlinu. Á leikskólanum í Spodsbjerg snerist vandamálið um það að svo til daglega var einhver starfsmaður fjarverandi frá vinnu. Þar hefur verið unnið með fjarvistastefnu í níu mánuði og starfsfólk hefur tekið umræðuna um skilgreiningu á veikindum og fjarveru. Í myndbandi 6 er meðal annars fjallað um verkefnið „Raunveruleg umhyggja“ sem sett var á laggirnar í leikskólanum.

Í tveimur nýjum dönskum myndböndum frá fyrirtækinu CABI, sem nálgast má hér með íslenskum texta, er fjallað um veikindafjarveru. Í myndbandi nr. 3 er fjallað um hvernig tekið er á skammtíma- og langtímafjarveru með því að útbúa verklagsreglur. Í myndbandi nr. 4 er áherslan á hvernig starfsvinur (mentor) hugar að líðan starfsmanna og kemur til hjálpar þegar starfsmaður tilkynnir veikindi. Í upphafi mættu hugmyndir um fjarverusamtal í skammtímafjarveru andstöðu því hugsunin var sú, að annað hvort væri fólk veikt og þá fjarri vinnu eða það væri frískt og mætti til starfa. Nú hefur ný hugsun rutt sér rúms og fjalla myndböndin meðal annars um breytt viðhorf.

Stefna um velferð, fjarvistir og endurkomu til vinnu eftir veikindi eða slys er yfirleitt ekki tilgreind sérstaklega í starfsmannastefnu vinnustaða hér á landi. Þó eru oft ákveðin vinnuferli sem ber að fylgja ef um miklar fjarvistir er að ræða eða þegar starfsfólk kemur aftur til starfa eftir langtímaveikindi.  Rannsóknir hafa sýnt fram á fækkun fjarvista og aukna starfsánægju hjá þeim fyrirtækjum sem hafa innleitt slíka stefnu. Meginþáttur í þróunarverkefninu Virkur vinnustaður er þarfagreining vinnustaðanna, mótun stefnu og innleiðing ferla tengdum fjarvistum og velferð starfsmanna. Hér má sjá dæmi um fjarverustefnur.   

Ársfundur VIRK verður haldinn fimmtudaginn 12. apríl 2012 kl. 8:00 til 12:00 í Hörpu í salnum Norðurljós.  Dagskráin er tvískipt.  Fyrri hluti fundarins inniheldur fræðandi erindi og hefst hann með ávarpi Guðbjarts Hannessonar velferðarráðherra kl. 8:15.  Vigdís Jónsdóttir framkvæmdastjóri VIRK mun síðan fara yfir starfsemi VIRK á síðastliðnu ári og Ingibjörg Jónsdóttir prófessor við Institute of Stress Medicine í Gautaborg mun halda erindi um reynslu og niðurstöður nýjustu rannsókna varðandi forvarnir og starfsendurhæfingu vegna kulnunar og síþreytu á vinnustöðum.   Kaffihlé verður frá kl. 10:30 til 11:00 og að því loknu hefjast hefðbundin ársfundarstörf.  Nánari upplýsingar um dagskrá ársfundarins er að finna hér. Ársfundurinn er öllum opinn og einnig er hægt að taka einungis þátt í fyrri hluta fundarins frá kl. 8:00 – 10:30.  Nauðsynlegt er að skrá þátttöku og það er hægt að gera hér (sjá einnig skráningarmöguleika hér til hægri á heimasíðunni).

Ástæður þess að starfsfólk er fjarverandi frá vinnu eru margvíslegar eins og vegna eigin veikinda, veikinda barna, aldraðra ættingja, andláts náinna ættingja og skólafría barna, svo dæmi séu tekin. Til þess að stjórnendur geti áttað sig á fjarveru starfsfólks og gert viðeigandi ráðstafanir þar að lútandi er nauðsynlegt að hafa yfirsýn yfir ástæður fjarverunnar og vinna með fjarverutölur. Á næstu vikum munu birtast á heimasíðu VIRK samtals átta dönsk myndbönd frá fyrirtækinu CABI um hagnýt ráð sem fjalla um það hvernig stjórnendum í samvinnu við starfsfólk hefur tekist að draga úr fjarveru frá vinnu. Í myndböndunum er rætt við stjórnendur, starfsfólk og trúnaðarmenn.