Fréttir

Þann 1.desember síðastliðinn var haldið NIVA námskeið á Hótel Sögu um geðheilsu og endurkomu til vinnu, en NIVA er norræn fræðslumiðstöð um vinnuvernd.  Helstu sérfræðingar á Norðurlöndunum fjölluðu þar um þetta efni auk þess sem nokkrir íslenskir sérfræðingar sem vinna í málaflokknum voru með erindi. Námskeiðið hefur verið haldið á öllum Norðurlöndunum og var opið öllum. Besta þátttakan var á námskeiðinu á Íslandi og er það mikið gleðiefni að fagfólk hérlendis sýni málefninu áhuga.

Rauland, sem er endurhæfingarstofnun í Noregi hefur sýnt sérhæfða mati VIRK mikinn áhuga undanfarna mánuði. Stofnunin hefur áhuga á að nota og prófa sérhæfða matið í sínu starfi og er að hefja undirbúning að því.  VIRK og Rauland hafa ákveðið að hefja samstarf og vinna nánari rannsóknir á matinu.  Starfsmenn Rauland komu til landsins nú í lok nóvember og funduðu með starfsmönnum VIRK og sérfræðingum í sérhæfðu mati.

„Ég get algjörlega þakkað Starfsendurhæfingarsjóði að ég er kominn með fasta vinnu. Mér fannst óhugsandi að hanga heima þótt ég sé með skerta starfsgetu fyrir gamla starfið mitt. Það eru til önnur úrræði,“ segir Ársæll Freyr Hjálmsson rafvirki sem lenti í alvarlegu vinnuslysi fyrir um ári síðan.  Hann leitaði til Sigrúnar Sigurðardóttur ráðgjafa VIRK og er nú kominn í fullt starf.

Í verkefninu Virkur vinnustaður sem lesa má um annars staðar hér á síðunni er stefnt að því að þátttökufyrirtækin/stofnanirnar útbúi stefnu um vellíðan, fjarvistir og endurkomu til vinnu.  Margar leiðir er hægt að fara að því að búa til slíka stefnu, en hún snýst meðal annars um að skapa vinnuumhverfi sem hefur áhrif á vellíðan fólks þannig að heilbrigða einstaklinga langi til að mæta í vinnuna. Gott vinnuumhverfi er þar sem starfsfólk er umburðarlynt gagnvart þeim sem vegna heilsu sinnar þurfa að hliðra til varðandi vinnuaðstæður, vinnutíma eða verkefni. Einnig þar sem skilningur er á því að veiku starfsfólki leyfist að vera veikt í ró og næði í stað þess að þrýsta á að það mæti sem fyrst til vinnu. Lykilatriði til að viðhalda lágmarks fjarvistum er góður vinnustaður og gott vinnuumhverfi. Lesa meira

Hildur Sigurðardóttir, leikskólakennari á Akureyri, hefur átt við bakveiki að stríða frá unglingsárum. Hún var greind með brjóskeyðingu og hefur tvisvar sinnum fengið brjósklos þótt hún sé aðeins 41 árs. Verkir í baki hafa lengi háð henni í starfi. „Ég gat yfirleitt stundað vinnu en þó komu dagar sem ég varð mjög slæm, það komu tímabil þar sem ég þurfti að minnka við mig starfshlutfall vegna bakverkja“ segir Hildur sem er nýútskrifuð frá Starfsendurhæfingarsjóði.  Þegar Hildur leitaði til ráðgjafa VIRK var hún alveg óvinnufær vegna bakverkja en núna er hún komin í 70% starf. 

Í nágrannalöndum okkar hefur verið lögð mikil áhersla á það á undanförnum árum að stjórnendur séu vakandi fyrir vellíðan starfsfólks með tilliti til andlegra erfiðleika eins og streitu, kvíða og þunglyndis. Hér á landi er þessi umræða ekki komin eins langt á veg. Margir stjórnendur eru óvissir um hvernig þeir geta brugðist við og aðstoðað starfsfólk sitt í þessum efnum. Starfsfólk er sömuleiðis oft í vafa um hvernig það á að styðja vinnufélaga sína sem glíma við kvíðaraskanir eða alvarlegt þunglyndi.

VIRK - Starfsendurhæfingarsjóður leitar að öflugum og metnaðarfullum sérfræðingi á sviði þróunar, gæða og eftirlits. Um er að ræða fullt starf við þróun, uppbyggingu og viðhald á gæða-, upplýsinga- og eftirlitskerfi auk tölfræðilegrar úrvinnslu gagna. 

Fræðsludagur fyrir ráðgjafa VIRK var haldinn í húsnæði BSRB 14. nóvember sl. Farið var yfir þróun á starfi ráðgjafa og mikilvæga þætti í starfinu s.s. nýtt verklag og nýjungar í upplýsingakerfi.  Árelía Eydís Guðmundsdóttir kom svo eftir hádegi og hélt erindi um starfsánægju og vellíðan í starfi. 

Þann 1. desember næstkomandi  verður haldið NIVA námskeið á Hótel Sögu um geðheilsu og endurkomu til vinnu. Helstu sérfræðingar á Norðurlöndunum koma hingað til að fjalla um þetta efni en auk þeirra munu íslenskir sérfræðingar sem vinna í málaflokknum tala. Námskeiðið er öllum opið. Geðsjúkdómar eru meðal algengustu ástæðna langtímaforfalla af vinnumarkaði  og því er samspil vinnuumhverfis og geðheilsu starfsmanna mikilvægt skoðunarefni til að draga megi úr slíkum forföllum og örva líkur á að þeir sem hafa veikst af geðsjúkdómi snúi aftur til vinnu. Kostnaður vegna námskeiðsins er 150 evrur/mann. Nánari upplýsingar um námskeiðið má fá á þessum hlekk.  http://www.niva.org/home/#article-22841-3730-nordic-tour-2011-mental-health-and-work-6111

Sérfræðingar sem koma að sérhæfðu mati  hjá VIRK eru nú nálægt þrjátíu talsins og eru matsteymi í Reykjavík, á Akureyri og á austurlandi.  Vinnudagur sérfræðinga í sérhæfðu mati var haldinn laugardaginn 29. október sl. í Háskólanum í Reykjavík.