VIRK og endurhæfingardeild Landspítalans að Laugarásvegi eru um þessar mundir að fara af stað með samstarfsverkefni með það að markmiði að byggja upp árangursríka starfsendurhæfingu fyrir ungt fólk með geðrofssjúkdóma á Íslandi.  Í upphafi verður sett upp tilraunaverkefni þar sem unnið verður eftir hugmyndafræði IPS (individual placement and support) með fimm ungum einstaklingum sem eru í þjónustu á Laugarásveginum.  
Ástæða þess að ákveðið var að fylgja hugmyndafræði IPS er sú að rannsóknir benda til þess að þetta sé áhrifaríkasta leiðin við að aðstoða fólk með þungar geðgreiningar út á vinnumarkað.  Rannsóknir sýna að fólk með þungar geðgreiningar sé þrisvar sinnum líklegra til þess að verða virkt á almennum vinnumarkaði í hlutastarfi eða fullu starfi ef farið er eftir hugmyndafræði IPS frekar en annarri hugmyndafræði.

Aðferðafræðin byggir á einstaklingsmiðuðum, miklum stuðningi við að komast í launaða vinnu og í kjölfarið tímabundnum stuðningi á vinnustaðnum fyrir starfsmanninn og vinnuveitandann.  IPS aðferðin er einstaklingsmiðuð og þar er unnið með styrkleika einstaklingsins og því passar grunnmat ráðgjafa VIRK mjög vel inn í upphafi ferils. Í þessu líkani er lögð áhersla á að samtvinna heilbrigðisþjónustu sem einstaklingar fá og stuðning við að fá og halda vinnu.  Því er lögð mikil áhersla á samstarf teymisins að Laugarásvegi og ráðgjafa VIRK í þessu verkefni. 

Starfsmenn VIRK og Laugarásvegar hafa nú hist nokkrum sinnum og gert drög að verkefnaáætlun. Einnig hefur verkefnið verið kynnt fyrir TR enda mikilvægt í einhverjum tilfellum að geta nýtt vinnusamninga í upphafi.  Ráðgjafar VIRK eru byrjaðir að hitta þá einstaklinga sem eru í tilraunaverkefninu og kortleggja með þeim styrkleika og áhuga í tengslum við vinnumarkaðinn. 
Er það von þeirra sem að verkefninu koma að það skili góðum árangri og geti þannig orðið upphafið að frekari uppbyggingu á árangursríkri starfsendurhæfingu fyrir einstaklinga með þungar geðraskanir á Íslandi.