Jónína Waagfjörð hefur verið ráðin sem verkefnastjóri hjá VIRK fyrir þróunarverkefnið Virkur vinnustaður. Hún er sjúkraþjálfari frá Háskóla Íslands og hefur starfað sem slíkur í yfir 20 ár. Árið 1989 útskrifaðist hún með MSc gráðu innan taugasjúkdóma og hreyfistjórnunar frá Boston University í Bandaríkjunum. Eftir útskrift starfaði hún í Bandaríkjunum við sjúkraþjálfun þar sem hún kenndi sjúkraþjálfun við University of South Alabama og vann einnig við meðhöndlun sjúklinga. Síðustu 3 árin starfaði hún sem yfirmaður endurhæfingarstöðvar í úthverfi Detroit í Michigan fylki. Eftir heimkomu tók Jónína við lektorsstöðu við læknadeild Háskóla Íslands innan sjúkraþjálfunar og rannsóknastöðu við Landspítala Háskólasjúkrahús og starfaði við það í 4 ár þar til hún flutti til Bretlands. 

Þar tók hún seinni MSc gráðu sína árið 2006 frá London School of Economics and Political Sicience innan heilsuhagfræði og stefnumótunar í heilbrigðismálum. Hún tók einnig diplómanám frá Endumenntun Háskóla Íslands í verkefnastjórnun og leiðtogaþjálfun árið 2009 og í framhaldi af því hefur hún unnið verkefni tengd fjarvistaskráningu á vinnumarkaði. Hún hefur verið virkur meðlimur Félags íslenskra sjúkraþjálfara og setið í stjórn og nefndum félagsins og situr nú í stjórn vísindasjóðs Félags íslenskra sjúkraþjálfara. Jónína hóf störf 1. mars síðastliðinn.