Ráðgjafafyrirtækið Talnakönnun hefur tekið saman fyrir VIRK nokkur einföld dæmi um fjárhagslegan ávinning þess þegar starfsendurhæfing skilar þeim árangri að einstaklingur tekur fullan þátt á vinnumarkaði í stað þess að fara á örorkulífeyri. 

Útreikningar miðuðust við mismunandi forsendur um aldur, launagreiðslur og tímabil starfsendurhæfingar. Reiknað var hver heildarlaun einstaklings yrðu til 67 ára aldurs.  Tekið var saman hvað lífeyrissjóður og Tryggingastofnun myndu greiða og hvert tap einstaklingsins yrði - en tap einstaklingsins miðast við þann hluta vinnulauna sem hann fær ekki bættan frá öðrum.

Niðurstaðan er samanlagt heildartap þessara aðila vegna varanlegrar örorku eða heildarávinningur þess að fjárfesta í viðkomandi einstaklingi með árangursríkri starfsendurhæfingu.  Á móti kemur síðan kostnaður við starfsendurhæfingu en hann er hér metinn sem full laun viðkomandi einstaklings í 2 ár.

Heildarfjárhæðin er núvirt með 3,5% vöxtum og miðað er við lífslíkur Íslendinga árin 2003-2008.

Um er að ræða talsverða einföldun því fleiri þættir hafa hér áhrif s.s. laun í veikindum frá atvinnurekendum, greiðslur úr sjúkrasjóðum, ýmis kostnaður innan heilbrigðiskerfisins og síðast en ekki síst aukin lífsgæði einstaklingsins sjálfs sem erfitt er að meta í krónum og aurum.  Engu að síður þá gefa útreikningarnir til kynna verulegan ávinning.

Í töflunum hér fyrir neðan má sjá niðurstöður þessara útreikninga m.v. mismunandi forsendur um mánaðarlaun og aldur.  Í efri töflunni eru heildartölurnar og í neðri töflunni er búið að núvirða þær m.v. 3,5% vexti:

Heildarávinningur:
Mánaðarlaun	250.000	350.000	450.000
Aldur
25	120.000.000	168.000.000	216.000.000
30	105.000.000	147.000.000	189.000.000
40	75.000.000	105.000.000	135.000.000
50	45.000.000	63.000.000	81.000.000
Núvirt 3,5%:
Mánaðarlaun	250.000	350.000	450.000
Aldur
25	59.421.000	83.189.400	106.957.800
30	55.533.000	77.746.200	99.959.400
40	45.496.000	63.694.400	81.892.800
50	31.578.000	44.209.200	56.840.400

 

Myndirnar hér að neðan sýna fjárhagslegan ávinning af árangursríkri starfsendurhæfingu 30 ára einstaklings miðað við þá forsendu að hann hefði 350 þúsund krónur í mánaðarlaun á starfsævinni og hvernig ávinningurinn skiptist á milli lífeyrissjóðs, Tryggingastofnunar ríkisins og einstaklingsins sjálfs.  Hlutur einstaklingsins miðast við þann hluta vinnulauna sem hann fær ekki bættan frá öðrum.

Í neðri myndinni hafa fjárhæðir verið núvirtar m.v. 3,5% vexti.