Nú fer senn að líða að ársfundi VIRK Starfsendurhæfingarsjóðs sem verður haldinn þann 11. apríl á Grand hótel. Dagskráin er tvískipt. Fyrir hádegi fara fram hefðbundin ársfundarstörf krydduð með fyrirlestrum um starfsendurhæfingu. Eftir hádegi sláum við síðan upp fagráðstefnu með þemanu „Að meta getu til starfa – Hvað skiptir máli?“ Ársfundurinn er öllum opinn en einnig er hægt að taka einungis þátt í fagráðstefnunni eftir hádegi, frá kl. 13:00 – 16:20.
Nauðsynlegt er að skrá þátttöku á fagráðstefnu hér

Aðal fyrirlesari ársfundarins og ráðstefnunnar er Mansel Aylward frá Cardiff háskóla í Bretlandi 
Mansel Aylward er einn af þeim sem þróuðu PCA (Personal Capability Assessment) matið sem er m.a. notað í dag af Tryggingastofnun ríkisins við mat á örorku og var almennt viðurkennt sem eitt það besta í  heimi. PCA matið, sem var kynnt til sögunnar í Bretlandi árið 1995, hefur þó þann galla að það tekur ekki nægjanlegt tillit til þess að starfsgeta byggist ekki síður á persónulegum, sálfræðilegum og félagslegum þáttum en læknisfræðilegum. Í Bretlandi er nú verið að endurskoða PCA matið samfara því að hleypa af stokkunum nýrri nálgun varðandi heilsu, vinnu og vellíðan með áherslu á þverfaglega nálgun sem m.a. byggist á líf-sál-félagslegri nálgun. Fyrirlestur Mansel mun fjalla um PCA matið og þær spennandi breytingar sem eru að eiga sér stað í Bretlandi. 

Aðrir fyrirlesarar eru Ása Dóra Konráðsdóttir, sviðsstjóri starfsendurhæfingar VIRK, Guðmundur Björnsson, endurhæfingar- og trúnaðarlæknir, Haraldur Jóhannsson, yfirlæknir læknisfræðilegrar ráðgjafar hjá TR og Vigdís Jónsdóttir, framkvæmdastjóri VIRK.

Nánari upplýsingar um dagskrá fagráðstefnunnar er að finna hér
Nánari upplýsingar um dagskrá ársfundarins er að finna hér