Undirritaður hefur verið nýr þríhliða samningur milli VIRK Starfsendurhæfingarsjóðs, Sjúkratrygginga Íslands, og Janusar endurhæfingar ehf. um samþætta og þverfaglega heilbrigðis- og starfsendurhæfingarþjónustu við ungt fólk á aldrinum 18 til 30 ára með flókinn og fjölþættan vanda.

Samningurinn tryggir þjónustu fyrir 80 einstaklinga sem falla undir skilgreiningu NEET, þ.e. sem eru ekki í vinnu, virkni eða námi og þurfa sérhæfða einstaklingsmiðaða þjónustu til að efla virkni og starfsgetu.

Vigdís Jónsdóttir, forstjóri VIRK: „Við erum hér að stíga mikilvægt skref í að samþætta betur þjónustu á sviði heilbrigðis og starfsendurhæfingar og koma til móts við viðkvæman hóp sem hefur mikla þörf fyrir þjónustu við hæfi.“

Markhópur verkefnisins eru ungmenni sem eru í ríkri þörf fyrir samþætta heilbrigðis- og starfsendurhæfingarþjónustu og tilheyra eftirfarandi undirhópum NEET-skilgreiningarinnar:

1. Ungmenni með þráláta kvíða- og/eða þráhyggju- og árátturöskun, fælni, þunglyndi, persónuleika- og/eða tilfinningavanda.
2. Ungmenni með röskun á einhverfurófi sem jafnframt eru með hamlandi geðræn vandamál.

Sérstök áhersla er lögð á náið samstarf og samráð VIRK og heilbrigðiskerfisins sem gefur möguleika á góðri, faglegri, heildrænni nálgun og samfellu í þjónustunni. Þjónustan stendur ungmennunum til boða alla virka daga.

Unnið hefur verið að undirbúningi samningsins frá því í byrjun þessa árs. Samningurinn byggir á tilraunaverkefni til tveggja ára og verður árangur verkefnisins metinn reglulega á samningstímanum með það að markmiði að halda áfram að bæta þjónustu við þennan mikilvæga hóp ungmenna.